حمایت شهروندان ولایت هلمند از تطبیق پروژه پایپ‌لاین گاز تاپی 

هیئتی از وزارت معادن و پترولیم و دفتر هماهنگی پروژۀ تاپی به تاریخ 29 سنبله 1398 به ولایت هلمند سفر نموده و با مقامات دولتی، اتحادیه‌های صنعت‌کاران، سرمایه‎گذاران، بزرگان اقوام و نمایندگان مردم محل دیدار نمود.

 در این سفر، هیئت مذکور در مورد پیشرفت‌های اخیر‌ پروژه گاز تاپی (به ویژه در بخش‌های تخنیکی، حقوقی و اجتماعی) و اشتراک جوامع محلی در مرحله تطبیق پروژه متذکره معلومات ارایه گردید.

همچنان، همکاران تخنیکی دفتر هماهنگی پروژه تاپی حین ملاقات‌شان با سرمایه‌گذاران، جوامع محلی و ادارات دولتی ولایت هلمند روی تامین نیازمندی‌های انرژی با استفاده از گاز پروژه تاپی برای رشد اقتصادی آن ولایت بحث و گفتگو نمودند.

مردم شریف ولایت هلمند ضمن قدردانی از کارکردهای اخیر، حمایت خویش را از تطبیق و عملی نمودن پروژه تاپی اعلام داشتند.  

وزارت معادن و پترولیم اشتراک مردم محل را در راستای تطبیق موفقانه پروژه‌های انکشافی یک امر حتمی و حیاتی می‎پندارد.