د کانونو او پټرولیم وزارت د 1401 کال د لاسته راوړنو او فعالیتونو راپور وړاندې کول
د کانونو او پټرولیم وزارت د پلان او پالیسۍ مرستیال شیخ ضیاءالرحمن الاریوبي د یکشنبې په ورځ 13/1/1402 نېټې د یوه خبري کنفرانس له لارې د کانونو او پټرولیم وزارت د یوه کال لاسته راوړنو او فعالیتونه راپور د حکومت د اطلاعاتو او رسنیو په مرکز رسینو ته وړاندې کړ.
په دې کنفرانس کې د مقام ویاند مفتي همایون افغان او د عوایدو رئیس مولوي محمد رسول عقاب هم ګډون درلود.
په پیل کې د وزارت د پلان او پالیسۍ مرستیال د وزارت د فعالیتونو، لاسته راوړنو او په کارونو کې د روڼتیا په اړه خبرې وکړې او ویې ویل: د خوښۍ ځای دی چې د افغانستان د اسلامي امارت له بریا وروسته د کانونو او پټرولیم وزارت توانیدلی چې د کانونو په برخه کې تر ټولو زیات عواید راټول کړي.
دغه راز ویاند مفتي همایون افغان د کانونو او پټرولیم وزارت د 1401 مالي کال د سروې، د لویو او کوچنیو کانونو د قراردادونو، د معدني موادو د پروسس اجازه نانې، د نفت او ګازو پروژې، مس عینک او ټاپي پروژې د لاسته راوړنو په اړه راپور وړاندې کړل. او همدارنګه یې د 1402 کال عمده پلانونو په اړه معلومات وړاندې کړل.
مفتي همایون افغان د کانونو او پټرولیم وزارت د عوایدو په اړه هم معلومات ورکړل او زیاته یې کړه: د کانونو او پټرولیم وزارت په 1401 کال کې (17،487،439،050) اوولس میلیارده، څلور سوه اوه اتیا میلیونه، څلور سوه نهه دېرش زره او پنځو افغانۍ عواید راټول کړي دي.
یاده برنامه د رسنیو پوښتنو ته په ځوابونو ورکولو سره پای ته ورسیده.
