د کانونو او پټرولیم وزارت د پورونو د کمېټې غونډه تر سره شوه
د پورونو کميټې غونډه نن شنبه د (6/12/1401) نېټې د مالي او اداري مرستیال مولوي حسام الدين صابري په مشرۍ د يادې کمېټې د غړو او د پور ورکوونکو شرکتونو د مسوولينو په شتون د مالي او اداري معینیت د غونډو په تالار کې ترسره شوه.
په دې غونډه کې د عوایدو د تنظیم رئیس مولوي محمد رسول عقاب د پلان شوي تولید، حقیقي تولید او د هغو قراردادي شرکتونو د پورونو په اړه چې له کلونو راهیسې نه دي ورکړي لنډ معلومات وړاندې کړل.
ورپسې بیا د کانونو او پټرولیم وزارت مالي او اداري مرستیال د پوروړو شرکتونو د نظریاتو او وړاندیزونو له اورېدو وروسته د خپلو پورونو د ورکړې په اړه د کانونو او افغانستان اسلامي امارت د قانون د مطابق لازمې لارښوونې ورکړې.
په پای کې قراردادي شرکتونو هم ژمنه وکړه چې خپل پورونه به پر خپل وخت ورکړي.
