د انجیرک په سیمه کې د سپین مرمر ډبرو کان پرانیسته
د کابل ولایت د شکردرې ولسوالۍ د انجیرک په سیمه کې د سپین مرمر ډبرو کان د پنجشنبې په ورځ د 25/12/1401 نیټې د کابل د کانونو رئیس، سیمه ییزو چارواکو او د قراردادي شرکت په شتون کې پرانیستل شو.
د کانونو او پټرولیم وزارت یاد کان د کانونو د استخراج او پروسس افغان لایټ سټون شرکت ته چې مخکې د داوطلبۍ په پروسه کې د رویالیټي په لوړ قیمت سره ګټونکی شوی وو وسپاره، چې د اکتشاف پروسې وروسته به له قرارداد سره سم استخراج شروع کړي.
د کابل د کانونو رئيس د انجيرک په سيمه کې د سپين مرمر ډبرو د کان د پرانېستې په مراسمو کې وويل: د دغه ډول کانونو د قرارداد له سپارلو څخه موخه د غير مسوولو کسانو له خوا د کانونو د غير قانوني استخراج مخنيوى او پر ځاى د تخنيکي او قانوني استخراج او د ځايي اوسېدوونکو لپاره کاري زمینې برابرول دي
او همدارنګه یې زیاته کړه: الحمدلله، له هغه وخته چې په افغانستان کې امنیت تامین شوی، د کانونو او پټرولیم وزارت د بهرنیو او کورنیو پانګوالو لپاره ډېرې اسانتیاوې برابرې کړي دي او ټول پانګوال کولای شي په پوره ډاډ سره د افغانستان د کانونو استخراج برخه کې پانګونه وکړي موږ یې هرکلی کوو.
