د کانونو او پټرولیم وزارت او د هلمند ولایت محلي ادارې، په هغه ولایت کې د کانونو د غوره مدیریت په اړه لازمي سلا مشورې وکړې
د کانونو او پټرولیم وزیر محمد هارون چخانسوري، نن غرمه د هلمند والي برید جنرال عبدالنبي الهام سره د ویډیوکنفرانس له لارې خبرې وکړې.
په دې کتنه کې د هلمند ولایت د کاني زېرمو د مدیریت، د هلمند ولایت له استخراجي فرصتونو څخه د سالمې ګټه اخیستنې، د قاچاق او غیرقانوني کیندنو د مخنیوي او د نورو کانې زېرمو د څېړنو په اړه هراړخیز بحث ترسره شو.
د کانونو او پټرولیم وزیر محمد هارون چخانسوري د هلمند د حوزې د نفت او ګازو د سروې لپاره د وزارت د پلانونو ترڅنګ د نورو کاني زېرمو د اقتصادي څېړنو په اړه هم خبرې وکړې.
محمد هارون چخانسوري وویل: هلمند د کاني زېرمو پراخ ظرفیت لري، موږ په پام کې لرو چې د واضح میکانیزم په رڼا کې له دې ظرفیتونو څخه د کاري فرصتونو د ایجادولو، د ولسي مشارکت د پیاوړتیا او د اقتصادي رفاه لپاره اغېزناکه ګټه واخلو.
