محمد هارون چخانسوري د افغانستان د کانونو او صنعت د خونې غړو ته په خطاب کې: مشترکو موخو ته د رسېدو لپاره باید په ګډه کار وکړو ترڅو په سکتور کې شفافیت او تحرک تامین او خلکو ته د کارموندنې فرصتونه ایجاد شي
د کانونو او پټرولیم وزارت سرپرست محمد هارون چخانسوري د کانونو او صنعت د خونې له رئیس ښاغلي شیرباز کمین زاده او د یادې خونې له یو شمېر غړو سره په ناسته کې د کانونو د قانون، د جواز ورکړې د پروسو، ټرانسپورټ، له قاچاق څخه د مخنیوي او د استخراج په پروسو کې د سهولت په اړه ددوی ستونزې او وړاندیزونه واورېدل.
د غونډې ګډونوالو یادو ستونزو ته د غوره رسیدګۍ لپاره د کانونو او پټرولیم وزارت او د کانونو او صنعت د خونې د کارکونکو په ګډون د یوې ګډې تخنیکي کمېټې د جوړولو وړاندیز وکړ چې د وزارت د رهبرۍ لخوا یې هرکلی وشو.
د کانونو او پټرولیم وزارت سرپرست محمد هارون چخانسوري وویل: ستاسې ستونزې او وړاندیزونه ددې ښکارندویي کوي چې زموږ موخې مشترکې دي او دغو موخو ته د رسېدو لپاره باید په ګډه کار وکړو ترڅو په سکتور کې شفافیت او تحرک تامین او خلکو ته د کارموندنې فرصتونه ایجاد شي.
ښاغلي چخانسوري وویل چې د کانونو د سکتور پانګوالو، په ځانګړي ډول د تالک، مرمرو، قیمتي او نیمه قیمتي ډبرو او د ډبرو سکرو د پانګوالو ستونزو ته د رسیدګۍ په موخه به میاشتنۍ غونډې ترسره کیږي ترڅو د ستونزو د حل لپاره موثرې برنامې طرحه او تطبیق شي.
