د کانونو او پټرولیم وزارت سرپرست د افغان پټرول شرکت له استازي سره وکتل
د کانونو او پټرولیم وزارت سرپرست شیخ الحدیث شهاب الدین دلاور په خپل کاري دفتر کې د افغان پټرول شرکت له استازي او مل پلاوي سره وکتل.
په دې کتنه کې دواړو لورو د افغانستان د کاني زېرمو په ځانګړي ډول د هېواد د نفتو او ګازو په برخه کې د پانګونې پر فرصتونو خبرې وکړې.
د کانونو او پټرولیم وزارت سرپرست وویل: د امنیت پر ښه والي سره په افغانستان کې د کانونو په برخه کې د پانګونې لپاره ډېر فرصتونه برابر شوی دي او د افغانستان د نفتو او ګازو مساحت شاوخوا دوه سوه زره کیلومټره مربع دی، چې استخراج او اکتشاف یې د کانونو او پټرولیم وزارت له لومړیتوبونو څخه دی، ترڅو د هېواد د ملي پانګوالو په همکارۍ و کولای شو له طبیعي او کاني زېرمو څخه د اقتصادي ودې او د هېواد د ځان بسیاینې په برخه کې ګټه پورته کړو او موږ هڅه کوو چې ملي او نړیوال پانګوال له دغو فرصتونو ګټه پورته کړي.
موږ د ملي او نړیوالو پانګوالو د هڅونې او جذب په موخه، قانوني همکارۍ او د لازمو اسانتیاوو رامنځته کولو ته چمتو یو.
