د کانونو او پټرولیم وزارت او خانه نور پوهنتون ترمنځ هوکړه لیک لاسلیک شو
د کانونو او پټرولیم وزارت او خانه نور پوهنتون ترمنځ د همکاریو هوکړه لیک د لیسانس په کچې د کمپیوټر ساینس، انجینرۍ، اقتصاد، حقوقو او سیاسي علومو په برخه کې د ۲۵ سلنه تخفیف سره د وزارت کارکوونکو ته د مناسبو زده کړو زمینه برابرولو په موخه د پلان او پالیسي مرستیال شیخ ضیاء الرحمن الاریوبي او د خانه نور پوهنتون رئیس پوهنیار محمد صابر انسان دوست له لوري لاسلیک شو.
د دغه هوکړه لیک د لاسلیک پر مهال د وزارت مالي او حسابي رئیس ښاغلي عبدالستارعرفان او د خانه نور پوهنتون مرستیال هم ګډون درلود، د یاد پوهنتون رئیس د دغه هوکړه لیک لاسلیک کېدل د کارمندانو د علمي سطحې د لوړولو په برخه کې یو مثبت او ارزښتناک ګام وباله، دوی د وزارت د کارکوونکو د پوهاوي کچې لوړولو په برخه کې د لا زیاتو همکاریو ډاډ ورکړ.
د پلان او پالیسۍ مرستیال هم د دغه هوکړه لیک لاسلیک د کانونو او پټرولیم وزارت د کارکوونکو د تعلیمي سطحې پراختیا په برخه کې ګټور وباله او د خانه نور پوهنتون له همکاریو یې مننه وکړه.
