محمد هارون چخانسوري: د کانونو ټولې پروژې به د ولسي تړون د پروګرام له لارې اجتماعي او اقتصادي خدمات وړاندې کړي ترڅو په سکټور کې ولسي مشارکت پیاوړی شي
د کانونو او پټرولیم وزارت سرپرست محمد هارون چخانسوري نن ماسپښین د کلیو بیارغونې او پراختیا وزارت سرپرست مجیب الرحمن کریمي سره د نوموړي د کار په دفتر کې وکتل. په دغه کتنه کې د ټاپي پروژې په مسیر کې د اجتماعي خدمتونو د برخې سربېره، د استخراجي صنایعو د سکتور په پروژو کې د اجتماعي فرصتونو څخه د ګټه اخیستنې، ولسي تړون پروګرام کې د سکتور د مشارکت او د دواړو وزارتونو ترمنځ د پیاوړې همغږۍ او ګډ کار په اړه بحث او خبرې وشوې.
د کانونو او پټرولیم وزارت سرپرست محمد هارون چخانسوري وویل: د افغانستان د کانونو د سکتور د لارې د نقشې پر بنسټ، ټولې اقتصادي پروژې چې اجتماعي خدمات وړاندې کوي باید د ولسي تړون پروګرام له لارې خپل لومړیتوبونه مشخص کړي ترڅو ولسي مشارکت پیاوړی شي، خلکو ته د دوی د ضرورتونو په اساس اجتماعي او اقتصادي خدمات وړاندي شي، د کار فرصتونه ایجاد شي او له ولس سره دې د همدې پروګرام د شوراګانو له لارې مشورې وشي.
ښاغلي چخانسوري زیاته کړه چې د ټاپی پروژې د مسیر په ولایتونو کې د اجتماعي خدمتونو د وړاندې کولو په خاطر دې د دواړو وزارتونو ترمنځ یو ګډ کاري ټيم تشکیل شي او د ولسي تړون د پروګرام څخه د ګټه اخیستنې په موخه دې د دواړو وزارتونو ترمنځ د همکارۍ سند لاسلیک شي.
دکلیو بیارغونې او پراختیا وزارت سرپرست مجیب الرحمن کریمي وویل: مونږ به د کانونو او پټرولیم وزارت سره د ولسي تړون پروګرامونو او شوراګانو له لارې خپل لومړیتوبونه وټاکو او ددې لپاره چې په اقتصادي پروژو کې د خلکو مشارکت وده وکړي، د کانونو او پټرولیم وزارت سره به له نږدې کار وکړو.
