د (MJAM) کمپنۍ رئيس سره د کانونو او پټرولیم وزارت سرپرست لیدنه
د کانونو او پټرولیم وزارت سرپرست وزیر شېخ الحدیث شهاب الدین دلاور د مس عینک پر پروژې د کار د پېل لپاره د چین هیواد د (MJAM) کمپنۍ له نوي رئیس ښاغلي خه شو پینګ سره نن سه شنبه 25/5/1401 نېټې په خپل کاري دفتر کې ورسره وکتل.
په دغه لیدنه کې د کانونو او پټرولیم سرپرست وزیر د مس عینک د پروژې تطبیق کېدل یې د افغانستان د اسلامي امارت له مهمو لومړیتوبونو وګاڼه او د مس عینک پروژه د افغانستان د اقتصادي پلوه یوه سټراتیژیکه پروژه ده چې د افغانستان اسلامي امارت او ټول افغان ولس ژر تر ژره د یادې پروژې د کار پېل غوښتونکي دي چې دغه پروژه د افغانستان د اقتصادي پراختیا لپاره ډېره مهمه ده.
د MJAM کمپنۍ رئیس د افغانستان اسلامي امارت بلخصوص د کانونو او پټرولیم وزارت له ملاتړ څخه مننه وکړه او وویل: لکه څنګه چې دا پروژه د افغانستان د خلکو لپاره مهمه او حیاتي ده، چین هم غواړي چې د یادې پروژې عملي کار ژر تر ژره پیل کړي. په همدې موخه د لرغونو اثارو د ساتلو او لېږولو لپاره یو شمېر لرغونپوهان د اطلاعاتو او کلتور محترم وزارت ته د مشاورینو او همکارانو په توګه معرفي کړي تر څو له هغوی سره په دې برخه کې مرسته او همکاري وکړي، همدارنګه د یادې پروژې پر اقتصادي او ټولنیزو مسایلو په اړه هم خبرې اترې وشوې.
