د کانونو او پټرولیم وزارت سرپرست د اروپايي ټولنې له سفیرې سره ولیدل
د کانونو او پټرولیم سرپرست وزیر شېخ الحدیث شهاب الدین دلاور د اورپا ټولنې له سفيرې اغلې رافیلا سره په خپل کاري دفتر کې ولیدل.
ښاغلي شېخ صاحب ورته د ښه راغلاست تر څنګ د اسلامي امارت د تېرو ۱۳ میاشتو لاسته راوړنو لکه د افغانستان د طبیعي زېرمو، فعالیتونو، عوایدو، شفافیت، ملي حاکمیت او سرتاسري امنیت په اړه لنډ معلومات وړاندې کړل. او زیاته یې کړه: موږ په دې هڅه کې یو چې د کانونو په سکټور کې لا زیاتې اسانتیاوې رامنځته کړو تر څو په دې سکټور کې د پانګونې زمینې برابرولو تر څنګ، لا ښه شفافیت او سرعت هم رامنځته کړو.
په دغه لیدنه کې دواړو لورو په بېلابېلو موضوعاتو په ځانګړي ډول د هیواد اوسني وضعیت د اړتیاوو او د ستونزو د حل په اړه خبرې وکړې.
اغلې رافیلا د یاد وزارت د پلانونو د ښه تطبیق ستاینه وکړه او همدارنګه یې د هیواد په پرمختګ کې د یاد وزارت رول مهم وباله.
د اروپایي ټولنې سفیرې د افغانستان د کانونو په برخه کې د همکارۍ ژمنه وکړه او همدارنګه یې د بشري مرستو پروګرامونو یادونه هم وکړه.
