د ملګرو ملتونو د سرمنشي له ځانګړي استازي سره د کانونو او پټرولیم وزارت سرپرست ناسته
د کانونو او پټرولیم سرپرست وزیر شیخ الحدیث شهاب الدین دلاور نن سه شنبه د 18/11/1401 نېټې د پلان او پالیسۍ مرستیال شیخ ضیاء الرحمن الریوبي، د جیولوجي سروې مرستیال نورالله ستانیکزي او د یو شمېر رئیسانو په شتون کې په افغانستان کې د ملګرو ملتونو د سرمنشي له ځانګړي استازي او مل پلاوي سره په خپل کاري دفتر کې ولیدل.
په دغه کتنه کې د افغانستان په کانونو کې د پانګونې او له بهر څخه هېواد ته د افغانانو د راستنېدو په ګډون پر بېلابېلو موضوعاتو خبرې وشوې.
د کانونو او پټرولیم وزارت سرپرست د ښه راغلاست ویلو وروسته په څه کم دوه کلونو کې د اسلامي امارت د لاسته راوړنو، د کانونو د اقتصادي ودې او پراختیا، په دندو کې د شفافیت او په ځانګړي ډول د هیواد د ټولیز امنیت په اړه خبرې وکړې.
ورپسې د ملګرو ملتونو د سرمنشي ځانګړي استازي د کانونو او پټرولیم وزارت د مشرتابه له مېلمه پالنې مننه وکړه او وې ویل: چې واقعاٌ د اسلامي امارت په راتګ سره د دغه هیواد په ټولو چارو کې شفافیت راغلي او همدارنګه یې د وزارت د رهبري هئیت د کارونو ستاینه وکړه.
په پای کې د کانونو او پټرولیم وزارت سرپرست له افغانستان سره د ملګرو ملتونو د مرستو او همکاریو قدرداني وکړه او په دوه اړخیزو همکاریو یې ټینګار وکړ.
