د کانونو او پټرولیم وزارت سرپرست د 77 شرکت له رئیس سره ولیدل
د کانونو او پټرولیم وزارت سرپرست شیخ الحدیث شهاب الدین دلاور نن یکشنبه د 17/2/1402 نېټې د ترکیې هیواد د 77 شرکت له رئیس ښاغلي سلیمان جلیوه سره وکتل او د هیواد د کانونو په ځانګړې توګه د سمنټو په برخه کې یې د پانګونې او د ګډو همکاریو د پراختیا په اړه خبرې او نظرونه سره شریک کړل.
د کانونو او پټرولیم وزارت سرپرست د 77 شرکت رئیس ته د ښه راغلاست تر څنګ د 77 شرکت د کارونو په ځانګړې توګه د کجکي بند د تطبیق کولو څخه مننه وکړه. او همدارنګه یې یادونه وکړه چې اوس مهال هم په افغانستان کې د پانګونې لپاره زمینه برابره ده. د کانونو او پټرولیم وزارت په دې برخه کې ټولو بهرنیو پانګوالو ته ښه راغلاست وايي.
د 77 شرکت رئیس وویل چې په ترکیه کې زیاتره پانګوال غواړي چې په بېلابېلو پروژو په ځانګړې توګه د کانونو په برخه کې پانګونه وکړي او ژمنه یې وکړه چې په دې برخه کې به د نورو پانګوالو پام هم راجلب کړي.
په پای کې د کانونو او پټرولیم وزارت سرپرست د دوی د علاقمندي تر څنګ د طرح او پروپوزلونو غوښتنه وکړه او د همکاریو ژمنه یې ورسره وکړه.
