لغمان ولایت کې د کانونو ساتنې او څارنې لپاره ځانګړې کمېټه جوړه شوه
د ا.ا اقتصادي کمېسیون د پرېکړې تطبیق لپاره د کانونو او پټرولیم وزارت مالي او اداري مرستیال مولوي حسام الدین صابري په مشرۍ یو پلاوی 20/10/1444 نېټې لغمان ولایت ته خپل سفر وکړ. او د لغمان والي الحاج قاري زین العابدین عابد، مرستیال والي او د ملکي او نظامي ادارې مسؤولینو سره ګډه ناسته تر سره کړه.
په پېل کې د کانونو او پټرولیم وزارت مالي او اداري مرستیال مولوي حسام الدین صابري ګډون والو ته د خپل سفر موخې په اړه وویل ”د رئیس الوزراء د هغه فرمان چې د کانونو غیري مسلکي کېندنې او قاچاق مختیوي په اړه صادر کړی په سمه توګه تطبیقول دي“.
نوموړي د کانونو او پټرولیم وزارت په مشرۍ د مستوفیت، اقتصاد، استخباراتو، امنيه قوماندانۍ، کرنې اوبو لګولو او مالدارۍ، چاپيريال ساتنې، بريېښنا، سوداګرۍ او صنعت او سينديزې حوزې رياستونو ته د ګډې کاري کمېټې ته دنده وسپارله، تر په لغمان ولايت کې د کانونو د ساتنې او څارنې لپاره په همغږۍ کار وکړي.
ورپسې بیا د لغمان والي د کانونو او پټرولیم وزارت مالي او اداري مرستیال او مل پلاوي ته د ښه راغلاست تر څنګ یې ورڅخه مننه وکړه چې دې ولایت ته مو خپل کاري سفر وکړ.
نوموړي وويل په لغمان ولایت کې د ټولو ملکي او نظامي ادارو ترمنځ ښه همغږي او همکاري موجوده ده، چې تل يې ستونزو ته په وخت رسيدګي کړې. او همدارنګه یې یاد پلاوي ته هم د هر اړخیزه همکاریو ډاډ ورکړ.
