د آمو دریا په نفتي حوزه کې د اته حلقې نویو څاه ګانو پرانیسته
نن د کانونو او پټرولیم سرپرست وزیر او د ریاست الوزرا اقتصادي مرستیال ملا عبدالغني برادر د آمو دریا نفتي حوزې د اته حلقه نویو څاه ګانو پرانیستې په موخه سرپل ولایت ته سفر وکړ.
د یادو څاه ګانو پرانیستې لپاره د جوړه شوې غونډې په پیل کې شیخ الحدیث شهاب الدین دلاور د یادې پروژې د اهمیت په اړه خبرې وکړې او زیاته یې کړه: چې د نویو څاه ګانو له پرانیستې سره به کېندل شوو څاه ګانو شمېر ۱۷ رسیږي او د استخراج کچه په ورځني ډول ۸۰۰ متره مکعب ته پورته شي
او همدارنګه په پام کې ده چې په نیږدې راتلونکي کې ۱۰ حلقې نوې څاه ګانې هم وکېندل شي چې د یادو څاه ګانو په کېندلو سره به د استخراج کچه نوره هم لوړه شي.
هغه همداراز د کاري فرصتونو په اړه هم خبرې وکړې او وویل: د دغې پروژې په پیل سره به څه باندې ۵۵۰ تنو ته په مستقیم او زیات شمېر ته به په غېري مستقیم ډول د کار زمینه برابره شي.
اقتصادي مرستیال هم د ځان بساینې په برخه کې د نفتو استخراج مثبت ګام وبللو او د سرپل ولایت اوسېدوونکو ته یې د زیاتو ټولنیزو خدمتونو پر برابرولو تاکید وکړ.
