د کانونو او پټرولیم وزارت سرپرست د ترکیې هېواد د هولدنک ایلدیزلم شرکت له استازي سره ولیدل
د کانونو او پټرولیم وزارت سر پرست شیخ الحدیث شهاب الدین دلاور د ترکیې هېواد د هولدنک ایلدیزلم شرکت له استازي ښاغلي علي واحد آتیچي سره په خپل کاري دفتر کې ولیدل.
په دغه لیدنه کې دواړو لورو د افغانستان د کاني زېرمو په برخه کې د پانګونې په شته فرصتونو، د بهرنۍ پانګونې د راجلبولو په موخه یې د سرتاسري امنیت په اړه بحث او نظرونه شریک کړل.
ترکي پانګوال د کانونو او پټرولیم وزارت د مېلمه پالنې څخه مننه وکړه، د سرو زرو، مسو او سرب کانونو په برخه کې یې د پانګونې غوښتنه وکړه.
د کانونو او پټرولیم وزارت سرپرست وویل: د امنیت په ټینګښت سره د افغانستان د کانونو په برخه کې د پانګونې لپاره ډېر فرصتونه رامنځته شوي، اوس مهال په کندز او فاریاب ولایتونو کې د سرو زرو لويې پروژې د پانګونې لپاره اعلان ته سپارل شوي دي، موږ هڅه کوو تر څو له دغه فرصت څخه ملي او نړیوال پانګوال ګټه واخلي او همدا راز د بهرنیو پانګوالو د هڅونې او راجلبولو په موخه هر ډول قانوني همکاریو او اسانتیاوو رامنځته کولو ته چمتو یو.
