د سمنګان ولایت د کانونو د ساتنې کمیټې لومړنۍ غونډې ترسره شوه
د سمنګان ولایت د کانونو د ساتنې کمیټې لومړنۍ غونډه د سمنګانو د والي الحاج ملا عبدالاحد فضلي په مشرۍ د کانونو رئیس، استخباراتو او د دغې کمیټې د نورو غړو په شتون کې ترسره شوه.
په پیل کې د یاد ولایت د کانونو رئیس د غونډې او د مسوولینو د لارښوونې په اړه خبرې وکړې همدا راز یې د اړوندو ستونزو او ننګونو په اړه وضاحت ورکړ ویې ویل: د کانونو او پټرولیم وزارت د رهبرۍ د پاملرنې له کبله د کانونو د خپل سري استخراج او قاچاق مخنيوى، چې يوله اساسي ستونزو څخه وه، نه يوازې په دغه ولايت کې، بلکې په ټول هېواد کې له منځه تللې او تر دې دمه د ٣٠٠ په شاوخواکې د کان کیندنې د استخراج جوازونه ویشل شوي دي.
ورپسې د سمنګان والي الحاج ملا عبدالاحد فضلي د یادې کمېټې د کاري طرزالعمل پر پلي کېدو او د کانونو له ریاست سره د دوی پر همکارۍ د ټینګار تر څنګ د کانونو د مدیریت په اړه خبرې وکړې او د کانونو د ساتنې د کمېټې جوړېدل یې مهم وبلل. ټینګار وکړ چې پر وخت سر دې غونډې جوړې کړي او له پایلو څخه دې د وزارت او ولایت محترمو مسوولینو ته خبر ورکړي.
په پای کې د کمېټې غړو د سمنګانو ولایت د کانونو د ساتنې په موخه خپل نظریات، وړاندیزونه او د حل لارې شریکې کړې او د لازمو همکاریو ژمنه یې وکړه.
