د کانونو او پټرولیم وزارت سرپرست د مس عینک قراردادي کمپنۍ له مسوولینو سره وکتل
د کانونو او پټرولیم وزارت سرپرست شیخ الحدیث شهاب الدین دلاور د مس عینک قراردادي کمپنۍ له مسوولینو سره په ناسته کې، د پروژې د وروستیو پرمختګونو، د مسو د پروسس د کارخونې د جوړېدو، د پروسس لپاره د برېښنا د تولید سرچینې او په نږدې راتلونکې کې د عملي کار پیل پر څرنګوالی باندې بحث او نظرونه شریک کړل.
د کانونو او پټرولیم وزارت سرپرست د مس عینک پروژه د هېواد لپاره یوه مهمه او حیاتي پروژه وبلله او د دغې کمپنۍ د ژمنو سره سم یې په هېواد کې دننه پر سل سلنه پروسس ټینګار وکړ.
د يادې کمپنۍ مسوولينو د چارو د لا ښه والي په موخه د وزارت له همکارۍ مننه وکړه او ژمنه يې وکړه، چې په نږدې راتلونکې کې به د تعهداتو مطابق د دغې پروژې عملي چارې پيل کړي.
