د کانونو او پټرولیم وزارت سرپرست د ټولګټو وزارت د اوسپنې پټلۍ له مرستیال سره وکتل
د کانونو او پټرولیم وزارت سرپرست شیخ الحدیث شهاب الدین دلاور، د پلان او پالیسۍ مرستیال شیخ ضیاءالرحمن الاریوبي په شتون کې د ټولګټو وزارت د اوسپنې پټلۍ له مرستیال ښاغلي مولوي بخت الرحمن شرافت سره په خپل کاري دفتر کې وکتل.
په دې کتنه کې دواړو لورو په بېلابېلو موضوعاتو او د هېواد د کانونو په برخه کې د پانګونې په اړه بحث او خبرې وکړې.
د ټولګټو وزارت د ریل پټلۍ مرستیال د هېواد په بېلابېلو برخو کې د ریل پټلۍ د جوړولو او د یادې ادارې د کاري پرمختګونو په اړه د وزارت له مشرتابه مننه وکړه، د کانونو له عوایدو څخه یې د رېل پټلۍ د پروژو د تمویل غوښتنه وکړه.
د کانونو او پټروليم وزارت سرپرست وويل: کانونه د هېواد ملي پانګه ده او د قرارداد او استخراج په برخه کې بايد هڅې او پاملرنه وشي، د کانونو له عوايدو څخه د سترو ملي پروژو تمويل وشي، د کانونو او پټرولیم وزارت هڅه کوي ترڅو کانونو په پوره روڼتیا او د کان کیندن دطرزالعمل مطابق قرارداد ته وسپارل شي او عواید باید ملي پروژو ته ځانګړې شي.
