د کانونو او پټرولیم وزارت سرپرست د پکتیا له مرستیال والي سره وکتل
د کانونو او پټرولیم وزارت سرپرست شیخ الحدیث شهاب الدین دلاور نن سه شنبه د 1403/4/5 نېټې د پکتیا ولایت له مرستیال والي او مل پلاوي سره په خپل کاري دفتر کې وکتل.
په دې کتنه کې په بېلابېلو موضوعاتو په ځانګړي ډول په هغه ولایت کې د کانونو د پروژو د پلي کېدو په اړه يې بحث او نظرونه شریک کړل.
د پکتيا مرستيال والي د کانونو او پټروليم وزارت له لوري د دغه ولايت د کاني زېرمو د مدیریت او روڼتیا په برخه کې خوښي څرګنده کړه او د دغه ولايت د خلکو وړانديزونه او ستونزې يې د کانونو او پټروليم وزارت له سرپرست سره شريکې کړې او د پروژو د پلي کېدو او په دغه ولايت کې د شته ستونزو د حل په برخه کې يې د وزارت له مشرتابه څخه د لا زياتې پاملرنې غوښتنه وکړه.
د کانونو او پټرولیم وزارت سرپرست ژمنه وکړه چې د شته امکاناتو په شتون کې به د دغه ولایت د خلکو ستونزو ته رسېدنه وشي.
