د طوطي میدان د ګازو بلاک عملي چارې پیل شوې
د جوزجان ولایت د طوطي میدان ګازو بلاک عملي چارې د ۱۴۰۴لمریزکال د وږي(سنبلې) میاشتې په ۲۳مه نېټه پیل شوې.
په یاده غونډه کې د ریاست الوزراء اقتصادي مرستیال ښاغلی ملا عبدالغني برادر، د کانونو او پټرولیم وزیر الحاج ملا هدایت الله بدري، د کار او ټولنیزو چارو وزارت مرستیال، د بلخ والي الحاج محمد یوسف وفا د اسلامي امارت لوړ پوړو چارواکو او د ازبکستان د جمهور رییس ځانګړی استازی عصمت الله ایرګشوف، د ازبکستان جمهوریت د انرژۍ وزارت مرستیال بختیار محمد کریموف د ایریل کام شرکت رییس او درسنیو استازو ګډون کړی وو.
د ریاست الوزراء اقتصادي مرستیال ښاغلي ملا عبدالغني برادر وویل: ډېر د خوښۍ ځای دی چې د طوطي میدان د ګازو بلاک د تولید، اکتشاف او استخراج په موخه د ایریل کام شرکت ته سپارل کېږي، چې نن ورځ به یې عملي چارې پیل شي، په دې سره به ګڼ شمېر هېوادوالو ته کاري فرصتونه برابر شي او افغانستان به د ګازو په برخه کې ځان بسیاینې ته ورسوي او له هېواد څخه د باندې به د ګازو د لېږد زمینه هم برابره شي په ټولو کورنیو او بهرنیو پانګوالو غږ کوم، چې په افغانستان کې پانګونه وکړي او د قراردادي شرکت له مسوولینو څخه هیله کوم چې ټول معیارونه په پام کې ونیسي.
د کانونو او پټرولیم وزیر الحاج ملاهدایت الله بدري زیات کړه: افغانستان او ازبکستان تاریخي ګاونډیان دي، زموږ د ولسونو اړیکې له پخوا د ورور ولۍ، سوداګرۍ او ګډو ګټو پر بنسټ ولاړې دي. نن ورځ د انرژۍ او طبیعي سرچینو په برخه کې د ملګرتیا یو نوی فصل پرانیستل کېږي، دا پروژه کولای شي د افغانستان او ازبکستان تر منځ د اقتصادي مشارکت یوه بېلګه وګرځي.
نوموړي د طوطي میدان د ګازو بلاک په اړه وویل: یاد کان ۷۵۰۰ کیلومټره مربع مساحت لري، له مخکې پکې ۵۰ ساختماني جوړښتونه تثبیت شوي او شاو خوا ۳۰ ژورې څاه ګانې شتون لري، د کانونو او پټرولیم وزارت او ایریل کام شرکت ترمنځ یې تړون د ۲۵ کلونو لپاره د اکتشاف، تولید او استخراج تړون لاسلیک شوی، افغانستان د جامدو کانونو ترڅنګ د نفتو او ګازو پراخه زېرمې لري، د اسلامي امارت موخه داده چې له دغو سرچینو څخه د هېواد د ځان بسیاینې، پرمختګ او د خلکو د هوساینې لپاره ګټه پورته کړي، د همدې موخې لپاره مو د هلمند او کټواز نفتي حوزې د سروې په موخه اعلان ته سپارلي.
د ازبکستان د جمهور رییس ځانګړی استازي عصمت الله ایرګشوف وویل: د ازبکستان او افغانستان اړیکې د ښه ګاونډیتوب پر بنسټ ولاړې دي له ټولو هغو کسانو څخه مننه کوم چې د طوطي میدان د ګازو پروژې د عملي چارو د پیل په برخه کې هلې ځلې کړي.
د کام ګروپ شرکت ستر سلاکار انجنیر محمد ګل خلمي د کام انرژي او طوطي میدان پروژې په اړه معلومات وړاندې کړل زیاته کړه: زموږ ستراتیژۍ د پروژې د پلي کېدو په برخه کې د طبیق وړ ده، موږ به په دغه پروژه کې له نوې ټکنالوژۍ څخه ګټه پورته کړو، د سیمې د انرژۍ په برخه کې به دغه پروژه حیاتي رول ولري.
د ازبکستان د انرژۍ وزارت مرستیال بختیار محمد کریموف د ازبکستان جمهوریت له لوري د یادې پروژې د پیل په اړه مبارکي وړاندې کړه او د دواړو هېوادونو ترمنځ یې دغه پروژه د اړیکو د پیاوړتیا سبب و ګڼله او د افغانستان له ځوان نسل سره به په دغه برخه کې تجربې شریکې شي.
دغه راز د کار او ټولنیزو چارو وزارت د کار مرستیال الحاج مولوي محمد ذاهد افغانستان او ازبکستان دوه ښه ګاونډیان یاد کړل او هیله یې څرګنده کړه، چې د پروژې چارې په ښې همغږۍ سره ترسره شي او د کار په برخه کې لومړیتوب افغانانو ته ورکړل شي.
