د مس عینک سیمې له مشرانو سره د کانونو او پټرولیم وزارت اړوندو مسئولینو ناسته
د لوګر ولایت د مس عینک سیمه یزې شورا مشرانو او مخورو د خپلو ستونزو د حل په موخه نن سه شنبه د 16/5/1403 نېټې د کانونو او پټرولیم وزارت له سلاکار الحاج محمدمعراج (معراج) سره وکتل.
په دې کتنه کې د دغه وزارت د مقام د دفتر رئیس مولوي مطیع الله حقاني، د عینک د مسو پروژې رئیس ښاغلي انجنیر حمیدالله حبیبي او د دوی تخنیکي ټیم هم ګډون درلود، په پیل کې د مس عینک سیمې مشرانو د کانونو او پټرولیم وزارت له رهبرۍ څخه مننه وکړه، د خپلو ستونزو سربېره یې دیادې پروژې د پلي کېدو په موخه خپل نظریات او وړاندیزونه شریک کړل.
ورپسې د مس عینک پروژې رئیس د یادو اوسېدونکو د ملکیتونو د استملاک په برخه کې د شته ستونزو د حل او د ترسره شویو کارونو په اړه لازم معلومات وړاندې کړل.
د کانونو او پټرولیم وزارت سلاکار د دوی د نظریاتو او ستونزو له اورېدلو وروسته د حل په برخه کې د همکارۍ ژمنه وکړه او زیاته یې کړه: د کانونو او پټرولیم وزارت به د استخراجي پروژو د پلي کېدو په برخه کې له هیڅ راز هڅو څخه ډډه ونه کړي.
په پای کې د یادې سیمې مشرانو هم په لوګر ولایت کې د کانونو او پټرولیم وزارت د برنامو او پلانونو د پلي کېدو په برخه کې له خپله اړخه د هر راز همکاریو او ملاتړ ډاډ څرګند کړ.
