د کانونو او پټرولیم وزارت د اطلاعاتو او عامه اړیکو نوی آمر معرفي شو

د کانونو او پټرولیم وزارت د مقام د حکم په اساس ښاغلی مولوي شفیق الله امیني د پلان او پالیسۍ د مرستیال شیخ ضیاء الرحمن الاریوبي له لوري د اطلاعاتو او عامه اړیکو د نوي آمر په توګه د یاد آمریت کارکوونکو ته ور وپېژندل شو.
د اطلاعاتو او عامه اړیکو د نوي آمر د معرفي غونډه کې د حقوقو عمومي رئیس مفتي داد محمد، د بشري سرچینو رئیس مولوي احمد ضیاء خاکسار هم ګډون کړی وو، د پلان او پالیسۍ مرستیال د اطلاعاتو او عامه اړیکو د کاري مسوولیتونو په اړه خبرې وکړې ویې ویل: په اداراتو کې تغیر او تبدیل یو اصل دی نو په همدې اساس موږ او تاسو ته لازمه ده چې د مشرانو د اوامرو اطاعت وکړو، ترڅو ملت ته د خدمت جوګه شو، له اړوندو کارکوونکو څخه یې و غوښتل چې ور سپارل شوې دندې په پوره صداقت او همغږۍ سره ترسره کړي، دغه راز یې د پخواني آمر د کارونو ستاینې ترڅنګ نوي آمر ته د دندې د مبارکۍ سربېره یې په چارو کې ورته دبریالیتوب هیله وکړه.
د اطلاعاتو او عامه اړیکو آمر د کانونو او پټرولیم وزارت د مشرتابه د باور څخه مننه وکړه، ژمنه یې وکړه چې خلکو او اسلامي نظام ته به د خدمت په برخه کې د کانونو او پټرولیم وزارت د مشرتابه سره په همغږۍ خپلو هڅو ته دوام ورکړي.
د یادونې وړ ده چې ښاغلی مولوي شفیق الله امیني د عبدالله بن مسعود له جامعې نه د دیني علوم په برخه کې د لیسانس تر کچې پورې زده کړې کړي دي او مخکې یې د لوګر پوهنتون کې د استاد په توګه دنده تر سره کوله.