د کانونو او پټرولیم وزارت سرپرست د اذربایجان او قرغزستان د کانونو وزارت له مرستیالانو سره وکتل
دکانونو او پټرولیم وزارت سرپرست الحاج ملا هدایت الله بدري د یکشنبې په ورځ د ۱۴۰۳/۱۲/۱۹ نېټې د قرغزستان د کانونو وزارت له پخواني مرستیال الماس بیک تومانوف، د اذربایجان د کانونو وزارت پخواني مرستیال ازر شکوروف او مل پلاوي سره په خپل کاري دفتر کې وکتل.
د د واړو هېوادونو پخوانیو مرستیالانو د وزارت د مشرتابه له مېلمه پالنې څخه د مننې په څرګندولو سره په افغانستان کې د پانګونې فرصتونه مناسب وګڼل. دوی د هېواد د کانونو په ځانګړې توګه د تېلو او ګازو په برخه کې د پانګونې په موخه د وزارت د همکارۍ غوښتنه وکړه او همدارنګه یې د یو معیاري لابراتوار د جوړولو ژمنه وکړه.
د کانونو او پټرولیم وزارت سرپرست هغوی ته د ښه راغلاست تر څنګ وویل: د کانونو او پټرولیم وزارت د بهرنیو پانګوالو د جلبولو او د هغوی لپاره د لا زیاتو اسانتیاوو د رامنځته کولو لپاره کار کوي او د کانونو د قوانینو سره سم به په دې برخه کې هر ډول اړینه همکاري وکړي.
