د کانونو او پټرولیم وزارت سرپرست د اسلامي همکاریو نړویوال سازمان د اسلامي فقې ټولنې له رئیس سره وکتل.
د کانونو او پټرولیم وزارت سرپرست شیخ الحدیث شهاب الدین دلاور د پنجشنبې په ورځ 2/4/1401 نېټې د اسلامي همکاریو نړیوال سازمان د اسلامي فقهې ټولنې له رئیس ښاغلي پروفیسور قطب سانو او د هغوی له مل پلاوي سره په خپل کاري دفتر کې وکتل.
د کانونو او پټروليم وزارت سرپرست افغانستان ته د ښاغلي قطب سانو راتګ څخه هرکلى وکړ او د افغانستان د کانونو او نورو برخو کې يې د اسلامي هېوادونو د پانګونې په برخه کې د دغه سازمان د لا زياتو همکاريو غوښتنه وکړه.
د اسلامي همکاريو د نړیوال سازمان د اسلامي فقهې ټولنې رئيس د دغه وزارت د مشرتابه له مېلمه پالنې مننه وکړه، بیا يې د خدای له دربار څخه د خوست او پکتيکا ولايتونو د زلزلې د شهيدانو لپاره د جنت فردوس او ټپيانو ته يې د عاجلې شفاء غوښتنه وکړه. او زیاته یې کړه چې د اسلامي همکاریو نړیوال سازمان د افغانستان ثبات ته ژمن دی او له افغانستان سره هر ډول مرستې هڅه کوي.
د کانونو او پټرولیم وزارت سرپرست د اسلامي همکاریو سازمان له غړو هېوادونو سره د مثبتو اړیکو او ملاتړ له امله مننه وکړه او زیاته یې کړه: چې دغه هېواد له ټولو هېوادونو په تېره بیا د اسلامي همکاریو سازمان له غړو هیوادونو سره د مثبتو اړیکو غوښتونکی دی.
