د کانونو او پټرولیم وزارت سرپرست د بادغیس ولایت له کاني زېرمو څخه لیدنه وکړه
د کانونو او پټرولیم وزارت سرپرست الحاج ملا هدایت الله بدري د بادغیس ولایت د کانونو امر قاري سید شمس الدین نظامي او مل پلاوي د یاد ولایت د بېلا بېلو کاني زېرمو څخه لیدنه وکړه.
د وزارت سرپرست د خپل سفر په لړ کې د لامان درې د ډبرو سکرو کان د استخراج بهیر ، د قلعه نو ښار اړوند د ګچ ډبرو د استخراج، پروسس او بسته بندۍ چارو، د بالا مرغاب ولسوالۍ د بزبای تنګي سیمې د سپین لاخ د تېلو او ګازو له زېرمو، د چشمه شیرین د کانې سیمو او د سنګ اتش د ګچو له کانونو څخه لیدنه او ارزونه وکړه. د تړوني شرکتونو استازو ته د استخراج، پروسس او روڼتیا، د سیمو خلکو ته د کاري فرصتونو برابرولو په موخه لازمې یې لارښوونې وکړې.
د کانونو او پټرولیم وزارت سرپرست د یاد ولایت خلکو سره د لیدنې پرمهال یې د هغوی ستونزې او وړاندیزونه واورېدل او د حل په موخه یې د همکارۍ ډاډ ورکړ.
د یادونې وړ ده چې د دغه سفر موخه د بادغیس ولایت د کانونو د استخراج او پروسس بهیر څخه د لیدنې او ارزونې سربېره هېواد والو ته د کاري فرصتونو برابرول دي.
