د کانونو او پټرولیم وزارت سرپرست د بامیانو ولایت له والي سره وکتل
د کانونو او پټرولیم وزارت سرپرست شیخ الحدیث شهاب الدین دلارو نن سه شنبه د بامیانو له والي مولوي عبدالله سرحدي سره وکتل او په دغه ولایت کې یې د پروژو او کاني زېرمو په اړه خبرې وکړې.
په دې کتنه کې د باميانو والي د کانونو او پټروليم وزارت له لوري د دغه ولايت د کانونو د ښه مديريت او روڼتیا په اړه خوښي څرګنده کړه، د کانونو د غير قانوني استخراج او قاچاق د مخنيوي لپاره يې د ټولو سيمه ييزو ارګانونو د بشپړې همغږۍ ډاډ ورکړ، دغه راز یې دیاد ولایت د خلکو وړاندیزونه د کانونو او پټروليم وزارت له سرپرست سره شریک کړل په دغه ولايت کې د کاني زېرمو د پروژو د پلي کېدو لپاره د دغه وزارت له مشرتابه څخه د لا زياتې پاملرنې غوښتنه وکړه.
د کانونو او پټرولیم وزارت سرپرست د بامیانو والي ته ډاډ ورکړ، چې د شته امکاناتو په شتون کې به د دغه ولایت د خلکو وړاندیزونو ته رسېدنه وشي.
