د کانونو او پټرولیم وزارت سرپرست د هرات او بادغېس ولایتونو له والیانو سره ولیدل
د کانونو او پټرولیم وزارت سرپرست شیخ الحدیث شهاب الدین دلاور د هرات له والي ښاغلي شیخ الحدیث مولانا نور احمد اسلام جار او د باد غېس له والي عبد الصمد جاوید سره په خپل کاري دفتر کې ولیدل.
د کانونو او پټرولیم وزارت سرپرست د یادو ولایتونو والیانو ته ښه راغلاست وویل، پر بېلابېلو موضوعاتو باندې یې خبرې وکړې، په ځانګړې توګه د یادو ولایتونو د کانونو په برخه کې د پانګونې او د پانګوالو په جلبولو، د کاري زمینې برابرولو په اړه یې بحث او نظرونه شریک کړل.
د هرات او بادغېس ولایتونو والیانو د خلکو ستونزې د وزارت د ر هبري له مقام سره شریکې کړې.
د کانونو او پټرولیم وزارت سرپرست د یادو ولایتونو والیانو ته ډاډ ورکړ، چې د کانونو او پټرولیم وزارت به د شته امکاناتو په شتون کې هڅه وکړي، چې د یادو ولایتونو د خلکو ستونزو ته رسېدنه وکړي.
