د کانونو او پټرولیم وزارت سرپرست له ملي پانګوالو او د هغوی له بهرنیو شریکانو سره وکتل

د کانونو او پټرولیم وزارت سرپرست شیخ الحدیث شهاب الدین دلاور په خپل کاري دفتر کې د حسیب صفي عاشوري سوداګریز شرکت له مسوولینو او د هغوی له چینايي شریکانو سره وکتل.
د کانونو او پټرولیم وزارت سرپرست ورته د ښه راغلاست ترڅنګ وویل: الحمدلله په ټول هېواد کې امنیت تامین دی، د کانونو په برخه کې د پانګونې لپاره ښه فرصتونه برابر شوي، د ټولو ملي او نړیوالو پانګوالو هرکلی کوو.
ورپسې د حسیب صفي عاشوري سوداګریز شرکت مسوولینو او د هغوی چینایي شریکانو د افغانستان اسلامي امارت له لوري د سرتاسري امنیت او د پانګونې لپاره د مناسبې زمینې برابرولو له امله مننه وکړه د سرو زرو، نفرایټو او مسو کانونو په برخه کې یې د پانګونې په موخه خپله لېوالتیا څرګنده کړه.
د کانونو او پټرولیم وزارت سرپرست د پانګونې په برخه کې د دوی د لېوالتیا هرکلی وکړ ډاډ یې ورکړ، چې د کانونو د قانون او طرزالعمل مطابق به د پانګونې په برخه کې د زمینې په برابرولو په موخه له دوی سره همکاري وکړي.