د کانونو او پټرولیم وزیر د ترکمنستان له سفیر سره وکتل
د کانونو او پټرولیم وزیر الحاج ملا هدایت الله بدري د ۱۴۰۵ لمریز کال د چنګاښ میاشتې په ۱۶مه، د سهشنبې په ورځ په خپل کاري دفتر کې د ترکمنستان له سفیر ښاغلي خواجه عوضوف سره وکتل.
په دې کتنه کې د ترکمنستان سفیر د ټاپي ګازو نللیکې پروژې د روانو چارو او وروستیو پرمختګونو په اړه معلومات وړاندې کړل ویې ویل: د ټاپي پروژې د پلي کېدو چارې په ښه توګه روانې دي او تر دې مهاله د افغانستان په خاوره کې ۱۰۲ کیلومټره نللیکه غځول شوې ده. نوموړي زیاته کړه د پروژې پاتې چارې به هم د ټاکل شوي مهالوېش له مخې بشپړې شي او د یادې پروژې په برخه کې به په ټولو شویو ژمنو عمل وشي.
د کانونو او پټرولیم وزیر د ترکمنستان سفیر ته د ښه راغلاست ترڅنګ د ټاپي ګازو نللیکې پروژې د پلي کېدو په برخه کې د افغانستان له لوري د هر ډول قانوني همکارۍ ډاډ ورکړ.
