محمد هارون چخانسوري: د ټاپي پروژې په تخنیکي، حقوقي، اقتصادي او اجتماعي برخو کې به اساسي تحرک رامنځته کړو ترڅو د پروژې د ساختماني چارو شروع کولو ته زمینه برابره شي
دکانونو او پټرولیم وزارت سرپرست محمد هارون چخانسوري نن ماسپښین د ټاپي پایپ لاین له اجراییوي رئیس محمد مراد امانوف سره د ویډیو کنفرانس له لارې د تعارفي کتنې په ترڅ کې، د پروژې د ګړندي تطبیق او د چارو د ښې همغږۍ، د پروژې د امنیت، د ځمکو د استملاک، د ګازو څخه داستفادې، او د پروژې په اجتماعي او اقتصادي اړخونو خبرې وکړې.
د کانونو او پټرولیم وزارت سرپرست محمد هارون چخانسوري وویل: د کانونو او پټرولیم وزارت په افغانستان کې د ټاپي ګاز د پایپ لاین د اصلي شریک په توګه ددې پروژې ګړندي تطبیق او د ښکېلو اړخونو ترمنځ د قوي همغږۍ د مسؤل په حیث کار کوي ترڅو له ټولو شریکانو سره د ټاپي پروژې په تخنیکي، حقوقي، اقتصادي او اجتماعي برخو کې د اساسي تحرک رامنځته کولو ته زمینه برابره شي او د مهال وېش په اساس د پروژې ساختماني چارې ژر پيل شي.
نوموړي زیاته کړه چې د ټاپي پروژې په مسیر کې د ځمکو د استملاک په هکله به د ښارجوړونې له وزارت سره همغږي رامنځته کړو او د خلکو د مشارکت په موخه به د انکشافي شوراګانو او ولسي تړون پرګرامونو څخه ګټه واخلو ترڅو د پروژې اجتماعي چارې منظمې شي.
