محمد هارون چخانسوري: د کانونو او پټرولیم وزارت به په راتلونکو پنځو کلونو کې د پانګونې د فرصتونو پر پراختیا تمرکز کوي

د کانونو او پټرولیم وزیر محمد هارون چخانسوري په مشرۍ د کانونو کاري ګروپ (Mineral Working Group) غونډه د ویډیو کنفرانس له لارې ترسره شوه. په دې غونډه کې، د اړونده سفارتونو، ډونرانو، خصوصي سکتور، مدني ټولنې او د کانونو او پټرولیم وزارت کارکونکو ګډون درلود. 

د کانونو کاري ګروپ (Mineral Working Group) د کانونو او پټرولیم وزارت، یو شمېر سفارتونو، خصوصي سکتور او مدني ټولنې له استازو څخه تشکیل شوی چې د استخراجي صنایعو د سکتور د برنامو او ستونزو په هکله منظم بحثونه ترسره کوي. 

د کانونو او پټرولیم وزیر محمد هارون چخانسوري وویل: د کانونو او پټرولیم وزارت به په راتلونکو پنځو کلونو کې د پانګونې د فرصتونو په پراختیا تمرکز کوي. 

محمد هارون چخانسوري زیاته کړه: موږ په ۲۰۲۰ کال کې له ۱۰۰ څخه د زیاتو ساحو جیولوجیکي سروې ترسره کړه او تېره اوونۍ مو د کوچني مقیاس ۵۶ پروژې اعلان ته ورسپارلې. له دې څخه موخه، په افغانستان کې د کانونو د متوسطې او کوچنۍ کچې د سوداګرۍ پراختیا ده.

د کانونو او پټرولیم وزیر، په ۲۰۲۱ کال کې د ۲۰۰ نویو ساحو د جیولوجیکي سروې، د کانونو د لارې په نقشه کې د تعریف شویو لومړیتوبونو پر بنسټ د تشکیلاتي اصلاحاتو او د تخنیکي او حقوقي ظرفیتونو د جلبولو په اړه، هراړخیز معلومات شریک کړل.

ورپسې، د کانونو او پټرولیم وزارت د پالیسۍ او استخراجي برنامو د تسهیل معین محمد عتیق ذکي د صادراتو د پالیسۍ د جوړولو لپاره د ګډو هلوځلو، د کانونو د انستیتیوت د ایجادولو او په حقوقي چارچوب کې د تعدیلاتو په اړه خبرې وکړې.

د غونډې په پای کې، د ګروپ د غړو پوښتنو ته د کانونو او پټرولیم وزارت د مسئولینو لخوا ځوابونه ورکړل شول.