محمد هارون چخانسوري: زموږ موخه د استخراجي صنایعو د سکتور له لارې له دوست هېواد تاجیکستان سره د دوه اړخیزو اقتصادي همکاریو پیاوړتیا ده
د کانونو او پټرولیم وزیر محمد هارون چخانسوري، نن سهار په کابل کې د تاجیکستان سفیر ډاکټر شریفي سعدي سره د خپل کار په دفتر کې وکتل. په دې کتنه کې، د کانونو او هایدروکاربن په برخو کې د همکارۍ د فرصتونو په اړه ګټور بحثونه ترسره شول.
د کانونو او پـټرولیم وزیر محمد هارون چخانسوري د تاجیکستان سفیر ته د ښه راغلاست ترڅنګ وویل: زموږ موخه د استخراجي صنایعو د سکتور له لارې له دوست هېواد تاجیکستان سره د دوه اړخیزو اقتصادي همکاریو پیاوړتیا ده او دې موخې ته د رسېدو لپاره دې ګډ تخنیکي ټیمونه وټاکل شي ترڅو د هراړخیزو بحثونو او مشورو په ترسره کولو سره، د همکاریو لپاره عملي زمینه برابره کړي.
په کابل کې د تاجیکستان سفیر ډاکټر شریفي سعدي وویل: د کانونو او هایدروکاربن په برخه کې د دوه اړخیزو همکاریو ترڅنګ،کولای شو چې د استخراجي صنایعو په برخه کې د افغانستان تخنیکي متخصصینو د ظرفیتونو د لوړولو په برخه کې هم همکاري وکړو.
محمد هارون چخانسوري د افغان متخصصینو د ظرفیت د لوړولو پخاطر د تاجیکستان هېواد له لېوالتیا څخه هرکلی وکړ.
