کانونو او پټرولیم وزارت وزیر د کانونو او صنایع خونو له رهبري هییت، معدنکارانو او صنعت کارانو سره غونډه وکړه.
په دغه غونډه کې د مرمرو، شوکاڼي، قیمتي او نیمه قیمتي تېږو او د ډبرو سکرو سکټورونو، د اوسپنې ویلي کېدلو اومالګې فابریکه دارانو ګډون درلود.
د غونډې په پېل کې د کانونو او پټرولیم وزیر ملا محمد عیسی اخند د غونډې ګډونوالو ته ښه راغلاست وویل.
وروسته بیا ګډونوالو وزیر ته د مبارکۍ تر څنګ تهعد او ژمنه وکړه چې موږ به له اسلامي امارات سره ګډ کار کوو، او له وزیر څخه یې غوښتنه وکړه چې د پورته یادوشوو سکټورنو زیاتې فابریکې د خامو موادو او قراردادونو د نشتون له امله غیر فعاله دي، باید قراردادونه راکړل شي او د قراردادونو پروسه اسانه شي تر څو پدې برخه کې خلکو ته د کار زمینه برابره شي او د هیواد صادرات لوړ شي.
د غونډې په پای کې وزیر له دوی سره ژمنه وکړه چې د شته ټولو ستونزو ته یې رسیدنه کوي او معدنکارانو سره په ګډه د حل لار پیدا کړي. ده همدا راز له معدنکارانو او صنعت کارانو وغوښتل چې د هیواد په ابادۍ کې دې رغنده رول ولوبوي او له اسلامي امارات سره یو ځای هیواد او خلکو ته خدمت وکړي.
