د کانونو او پټرولیم وزارت سرپرست د مس عینک کان قراردادي کمپنۍ له رئیس سره وکتل
د کانونو او پټرولیم وزارت سرپرست شیخ الحدیث شهاب الدین دلاور په خپل کاري دفتر کې د مس عینک کان قراردادي کمپنۍ له رئیس ښاغلي سانګ سره وکتل.
په دې کتنه کې د مس عینک کان اړوند د بېلابېلو موضوعاتو په اړه یې خبرې وکړې، د یادې کمپنۍ رئیس د پروژې د وروستیو پرمختګونو په اړه معلومات وړاندې کړل، د پروژې د عملي پیل لپاره یې خپل کاري پلانونه او وړاندیزونه شریک کړل سربېره پردې یې د وزارت له مشرتابه څخه د لازمو لارښوونو غوښتنه وکړه.
د کانونو او پټرولیم وزارت سرپرست د دوی د وړاندیزونو او کاري پلانونو له اورېدو څخه وروسته د دې پروژې د کار د چټکتیا او په نږدې راتلونکې کې د عملي کار د پیل غوښتنه وکړه او لازمې لارښوونې وکړې.
