د کانونو او پټرولیم وزارت سرپرست د اوبو او انرژۍ وزارت له سرپرست سره وکتل

د کانونو او پټرولیم وزارت سرپرست الحاج ملا هدایت الله بدري د یکشنبې په ورځ د 1403/8/20 نېټې په خپل کاري دفتر کې د اوبو او انرژۍ وزارت له سرپرست ملا عبداللطیف منصور سره وکتل.

په دې کتنه کې یې د هېواد د کاني زېرمو د ښه مدیریت، پانګوالو ته د پانګونې زمینې برابرولو، د کاري فرصتونو په رامنځته کېدو او د کانونو له عوایدو څخه د اوبو او برېښنا بندونو د جوړولو او د دواړو وزارتونو ترمنځ د لا زیاتې همغږۍ په رامنځته کولو یې بحث او خبرې وکړې.

د کانونو او پټرولیم وزارت سرپرست د اوبو او انرژۍ وزارت د وزیر په راتګ خوښي څرګنده کړه، دغه راز یې د افغانستان د کاني زېرمو له عوایدو څخه د اوبو او برېښنا بندونو د جوړولو په برخه کې د کانونو د کړنلارې مطابق د هر اړخېزې همکارۍ ډاډ ورکړ.