د کانونو او پټرولیم وزارت د تخنیکي پلټنې رئیس د ولایتونو د قراردادي شرکتونو له استازو سره وکتل
د کانونو او پټرولیم وزارت د کانونو د تخنیکي پلټنې ریاست د خپل کلني پلان له مخې، د هېواد د طبیعي زېرمو د قانوني او معیاري استخراج د بهیر د لا ښه والي په موخه، د پروان او کونړ ولایتونو د کانونو د قراردادي شرکتونو له استازو سره د کانونو د استخراج او پروسس په تړاو ناستې ترسره کړې.
د دغو ناستو بنسټیزه موخه د ۱۴۰۵ مالي کال په ترڅ کې د یادو شرکتونو د فعالیتونو په اړه د ترسره شوې تخنیکي ارزونې د پایلو شریکول او د چارو د ښه والي لپاره د لازمو سپارښتنو وړاندې کول وو.
د کانونو د تخنیکي پلټنې رئیس، حافظ عبداللطیف خالد په خپلو خبرو کې د شرکتونو تخنیکي او اداري نیمګړتیاوې په ګوته کړې او د فعالیتونو د اصلاح او معیاري کېدو لپاره یې اړینې لارښوونې او لازمې سپارښتنې وړاندې کړې.
د قراردادي شرکتونو استازو د وزارت له جدي څارنې او لارښوونو څخه د مننې ترڅنګ ژمنه وکړه، چې د ریاست ټولې سپارښتنې او توصیې به په ټاکلي وخت عملي کوي. هغوی همداراز د وزارت له رهبرۍ څخه د تخنیکي همکاریو د لا زیاتوالي غوښتنه وکړه.
په پای کې د تخنیکي پلټنې رئیس د شرکتونو استازو ته ډاډ ورکړ، چې د افغانستان اسلامي امارت د پانګوالو د ستونزو حل او ملاتړ ته ځانګړې پاملرنه کوي او په بېلابېلو برخو کې له هغوی سره هر اړخیزو تخنیکي همکاریو ته ژمن دی.
نوموړي ټینګار وکړ، چې د هېواد د طبیعي زېرمو د معیاري، قانوني او روڼ استخراج د تأمین په موخه به د تخنیکي پلټنو بهیر په دوامداره توګه روان وي او د کانونو د قراردادي شرکتونو د اصلاحاتو د څرنګوالي څارنه او ارزونه به په پوره ژمنتیا سره دوام ولري.
