د کانونو او پټرولیم وزارت استازو د کولمبیا هیواد نه لیدنه ترسره کړه
د کانونو او پټرولیم وزارت لوړ پوړي پلاوي د وزارت د پالیسۍ او برنامو معین او دسروی جیولوژي معین په مشرۍ د (CLDP) او (USGS) په مرسته د کولمبیا د کانونو د سکتور څخه رسمي لیدنه ترسره کړه.
د سفر په جریان کې ، پلاوي د کولمبیا هیواد د کانونو او انرژۍ وزارت د مرستیال وزیرې او رییسانو سربیره ، د کولمبیا جیولوژیکي سروې ، د کولمبیا د کانونو ادارې ، د کولمبیا زمرد فدراسیون او د صنعتکارانو زمرد اتحادیې سره وکتل.
د کانونو او پټرولیم وزارت استازو د مازو په نوم د زمرد کان څخه لیدنه وکړه ترڅو د کانونو په سکتور کې نوې تجربې ترلاسه کړي.
د دې سفر په جریان کې، افغان استازو نه یوازې د کانونو په سکتور کې د افغانستان تجربې او ستونزې شریکې کړې ، بلکې د دوست هیواد کولمبیا څخه يي په مختلفو برخو کې تجربې او دهمکاریو تعهد ترلاسه کړه.
په دې ناسته کې ، افغانستان د کولمبیا د کانونو او انرژۍ وزارت سره د همکارۍ ، د معلوماتو تبادلې او د کانونو په اړه ګډې څیړنو په اړه د تفاهم لیک لاسلیک کولو وړاندیز وکړ؛ د کولمبیا د کانونو وزارت یاد وړاندیز سره هوکړه وکړه او په راتلونکو میاشتو کې یي د نهایی کیدو موافقه وکړه.
سربیره پردې ، د کولمبیا زمرد فدراسیون له افغانستان سره همکارۍ ته لیوالتیا وښوده او یادونه یې وکړه چې دوی چمتو دي چې دافغان کان ایستونکو لپاره ښوونیزی برنامې جوړې کړي.
د افغانستان د کانونو او پټرولیم وزارت به دهمکاریو دتعقیب په اړه خپلو هڅو ته دوام ورکوي؛ ترڅو په سکټور پرمختګونو ته زمینه برابره شي.
