د سرپل له والي سره د کانونو او پټرولیم وزارت سرپرست لیدنه
د کانونو او پټرولیم وزارت سرپرست شیخ الحدیث شهاب الدین دلاور د دوشنبې په ورځ 1/3/1402 نېټې د سرپل ولایت له والي محترم ملا عبدالرحمن اکه سره په خپل کاري دفتر کې وکتل.
په دغه لیدنه کې د کانونو او پټرولیم وزارت سرپرست او د سرپل والي د بېلابېلو موضوعاتو تر څنګ د سرپل ولایت د کاني زیرمو په ځانګړي ډول د قشقري د نفت پروژې په اړه خبرې او نظرونه سره شریک کړل.
د سرپل والي د دغه ولايت د خلکو ستونزې د وزارت له مشرتابه سره شريکې کړې او همدارنګه یې د قشقري د نفت پروژې د تطبيق، ټولنيزو خدمتونو او د دغه ولايت خلکو ته د کاري زمینې برابرولو په اړه يې خپل نظرونه او وړانديزونه وړاندې کړل.
د کانونو او پټرولیم وزارت سرپرست د سرپل والي ته ډاډ ورکړ، چې د دې پروژې په پلي کېدو سره به د جوماتونو، ښوونځیو، روغتیايي مرکزونو د جوړولو، له قرارداد شوې سیمې څخه د دغه ولایت تر مرکز پورې د 12 کیلومتره حلقوي سړک جوړول تر څنګ به نورو خدمتونه هم تر سره شي. او همدارنګه د کانونو او پټرولیم وزارت مشرتابه هڅه کوي چې د خپلې وس مطابق د دغه ولایت ستونزو ته رسېدنه وکړي.
