د کانونو او پټرولیم وزارت سرپرست د هېواد له اهل هنود پانګوال سره وکتل
د کانونو او پټرولیم وزارت سرپرست شیخ الحدیث شهاب الدین دلاور له یو تن اهل هنود پانګوال چې د کانونو په برخه کې د پانګونې په موخه هېواد ته راستون شوی دی په خپل کاري دفتر کې وکتل.
په دغه کتنه کې نوموړي د اسلامي امارت د هغې پرېکړې په اړه چې د اهل هنودو غصب شوي ملکیتونه راګرځوي خو ښي څرګنده کړه، سربېره پر دې یې د افغانستان د کانونو په برخه کې په ځانګړې توګه د سرب، جست، مرمر او ډبرو سکرو کانونو په برخه کې د پانګونې په موخه خپله لېوالتیا څرګنده کړه.
د کانونو او پټرولیم وزارت سرپرست د هېواد دکاني زېرمو په برخه کې د پانګونې په موخه د هغوی د لېوالتیا هر کلی وکړ ویې ویل: افغانستان د ټولو افغانانو ګډ کور دی، ټول اهل هنود د نورو وګړو په څېر د هېواد د کانونو او نورو ټولو شتمنیو کې برابر شریک دي، اهل هنود پانګوال د نورو پانګوالو په څېر کولی شي د اصولو او مقرراتو مطابق د افغانستان د کانونو په برخه کې پانګونه وکړي، د کانونو او پټرولیم وزارت چمتو دی چې په دې برخه کې همکاري وکړي.
په پای کې دواړو لورو د ملي یووالي په اړه ټینګار وکړ د هېواد په ودانولو او ځان بساینې په برخه کې د ټولو هغو افغان پانګوالو چې له هېواد څخه بهر دي را ستنېدل یې اړین وبلل.
