دامو دریا نفتي حوزې د 25 څاګانو افرګشايي ترسره شوه

د امو دریا نفتي حوزې د 18 نویو څاګانو د کیندنې، د 5 څاګانو د ترمیم او د 2 څاګانو د اکتشاف آفر ګشايي غونډه د کانونو او پټرولیم وزارت د سرپرست شیخ الحدیث شهاب الدین دلاور په مشرۍ، د یو شمېر رئیسانو، ټاکلي پلاوي او داوطلبو شرکتونو په شتون کې د یاد وزارت په مقام کې د یوې رڼې پروسې په ترڅ کې ترسره شوه.

په دغه آفرګشايي کې 3 شرکتونو ګډون کړی و، چې د هغو له جملې څخه د Zhen Xing Oilfild Technical Service FZE شرکت د 35 میلیونو ډالرو د کم او مناسب قېمت په وړاندې کولو سره ګټونکې اعلان شو.

د یادونې وړ ده چې د تېرې ادارې(جمهوریت) پر مهال  یوي څاه کيندنه په 8.5 میلیون ډالرو په ارزښت په قرارداد ورکړل شوې وه، اوس مهال د کانونو او پټرولیم وزارت له لوري د یوې څاه کیندنه د 1.75 میلیونه ډالرو په ارزښت په قرارداد ورکړل شوه، په ټولیزه توګه 20څاګانوکیندنه  35 میلیونه ډالره کېږي ، چې د تېرې ادارې د قرارداد په پرتله 135 میلیونه ډالروپه توپیر دهیواد اوملت په ګټه تمام شو.