د آمو دریا نفتي حوزې زمرد سای سیمې څخه د نفتو استخراج پیل شو

د آمو دریا نفتي حوزې اړوند د زمرد سای سیمې له پنځو څاه‌ګانو څخه د نفتو استخراج پیل شو.
په همدې مناسبت جوړه شوې غونډ کې د ریاست الوزراء اقتصادي مرستیال ملا عبدالغني برادر اخند، د کانونو او پټرولیم وزیر الحاج ملا هدایت الله بدري، د کرنې اوبو لګولو  او مالدارۍ وزیر مولوي عطاالله عمري، سیمه‌ییزو مشرانو او د رسنیو استازو ګډون کړی و.
غونډه کې د کانونو او پټرولیم وزارت سلاکار مولوي احمدجان مېلمنو ته ښه راغلاست ووایه او د یادې نفتي حوزې په اړه یې معلومات وړاندې کړل وویل، د درې کلونو سروې، څېړنې او برمه‌کارۍ وروسته وتوانېدو چې د زمرد سای سیمې له ۱۲ څاه ګانو څخه له پنځو څاه ګانو په ازمېښتي ډول استخراج پیل کړو چې په ورځني ډول ٥٠٠ ټنه نفت استخراج کېږي.
هغه زیاته کړه چې د دغې پروژې ټولې چارې د افغان انجنیرانو له لوري پر مخ وړل کېږي او یوازې په تېرو شپږو میاشتو کې د زمرد سای په سیمه کې ۴۰۰ کیلومتره نوې سروې ترسره شوې، چې په پایله کې یې د نفتو او ګازو نوې نښې موندل شوې دي.
نوموړي همداراز وویل، د هرات نفتي حوزې د تېرپل سیمې لپاره یو افغاني شرکت چمتو دی، چې شاوخوا ۶۰ میلیونه ډالره پانګونه وکړي.
هغه ټینګار وکړ چې د هېواد د طبیعي سرچینو د سم مدیریت، اغېزمنې ګټې اخیستنې او پراختیا لپاره ستر پلانونه تر لاس لاندې دي، چې ټول به په منظم ډول د افغان متخصصینو له لوري عملي شي.