د افغانستان د کانونو په برخه کې ترکي پانګوالو خپله لېوالتیا څرګنده کړه
د ترکیې د کان کیندنې، سوداګرو او پانګوالو یوه پلاوي نن د کانونو او پټرولیم وزارت له سرپرست ملا هدایت الله بدري سره وکتل او د افغانستان په کانونو کې یې د پانګونې لېوالتیا څرګنده کړه.
په دې کتنه کې د کانونو او پټرولیم وزارت سرپرست ترکي پانګوالو ته ښه راغلاست وویل زیاته یې کړه: افغانستان او ترکیه مذهبي او تاریخي اړیکې لري، نوموړي دغه راز افغانستان د کانونو په برخه کې يو بډايه هېواد وباله او زياته يې کړه، د اسلامي امارت له حاکمیت وروسته په ټول هېواد کې سرتاسري امنیت او ملي حاکمیت تامین شوی دی، ټولو کورنیو او بهرنیو پانګوالو ته په ځانګړې توګه د ترکیې مسلمان او دوست هېواد د پانګوالو لپاره زمینه برابره شوې تر څو له دغه فرصت څخه په استفادې د افغانستان د کانونو په برخه کې پانګونه وکړي.
دیاد پلاوي رئیس ښاغلي حسین آکچا د ترکي پانګوالو په استازیتوب د کانونو او پټرولیم وزارت له سرپرست څخه د مېلمه پالنې مننه وکړه، د افغانستان په اوسني حالت او سرتاسري امنیت يې خوښي څرګنده کړه.
دوی دغه راز د دواړو هېوادونو ترمنځ د اقتصادي او سوداګریزې پراختیا، د کانونو د استخراج او اکتشاف په برخه کې یې د خپلو تجربو شریک کولو سربېره د سرو زرو، مرمر، او رخام په برخه کې یې د پانګونې غوښتنه وکړه.
د کانونو او پټرولیم وزارت سرپرست د ترکیې دوست او مسلمان هېواد پانګوالو سره د اسلامي امارت د پالیسۍ له مخې د لازمو همکاریو ژمنه وکړه.
