د ملګرو ملتونو د بشري مرستو د همغږۍ دفتر له مرستیال سره د کانونو او پټرولیم وزارت سرپرست لیدنه
د کانونو او پټرولیم وزارت سرپرست شیخ الحدیث شهاب الدین دلاور نن یکشنبه ۲۱/۳/۱۴۰۲ نېټې په افغانستان کې د ملګرو ملتونو د بشري مرستو د همغږۍ دفتر د اوچا دفتر له مرستیال ښاغلي محمد زید خاطر او مل پلاوي سره په خپل کاري دفتر کې ولیدل.
د کانونو او پټرولیم وزارت سرپرست ورته د ښه راغلاست تر څنګ د اسلامي امارت د لاسته راوړنو، د کانونو د اقتصادي ودې او پراختیا، په چارو کې د روڼتیا او په ځانګړي ډول د هیواد د سرتاسري امنیت په اړه خبرې وکړې.
ورپسې د ملګرو ملتونو د بشري مرستو د همغږۍ د دفتر د اوچا دفتر مرستیال د کانونو او پټرولیم وزارت د مشرتابه له مېلمه پالنې مننه وکړه او ویې ویل: د اسلامي امارت په راتګ سره واقعاً په دغه هیواد کې سرتاسري امنیت او په چارو کې روڼتیا راغلی ده. او همدارنګه یې د وزارت مشرتابه له لوري په کانونو کې د ماشومانو د کار پر منع کولو خوښي څرګنده کړه.
په پای کې د کانونو او پټرولیم وزارت سرپرست له افغانستان سره د ملګرو ملتونو د مرستو او همکاریو قدرداني وکړه او پر دوه اړخیزو همکاریو یې ټینګار وکړ.
