د هرات ولایت د سمنټو پروژې د تړون لاسلیک

د کانونو او پټرولیم وزارت سرپرست شیخ الحدیث شهاب الدین دلاور د یکشنبې په ورځ د 23/7/1402 نېټې د سمنټو دریم لوی تړون چې په هرات ولایت کې موقعیت لري له ګلبهار ګروپ سره د رسنیو په شتون کې لاسلیک کړ.

د کانونو او پټرولیم وزارت سرپرست د یادې پروژې د تړون لاسلیک غونډه کې وویل: د خدای (ج) له درباره څخه ډېر شکر ګذار یم، چې له کلونو نا امنیو وروسته د یوې سترې ملي پروژې د تړون لاسلیک شاهدان یو، د کندهار او پروان ولایت جبل السراج سمنټو پروژو څخه وروسته دریمه ستره د سمنټو تولیدي پروژه ده، د هرات ولایت د سمنټو پروژه له کورني پانګوال او کمپنۍ سره لاسلیک کوم.

همدارنګه د کانونو او پټرولیم وزارت سرپرست وویل: یاده پروژه د (142) میلیونه امریکايي ډالرو په ارزښت پانګونې سره به د 30 کالو لپاره په قرارداد ورکول کېږي او 5000 زره کسانو ته به مستقیم  ډول د کار زمینه برابره شي او افغانستان به د سمنټو له درکه په ځان بسیا شي او صادرات به هم ولرو.

په دغو مراسمو کې د ګلبهارګروپ کمپنۍ مرستیال د یاد تړون لاسلیک یو مهم او بنسټیزګام د افغانستان د اقتصادي پرمختګ په برخه کې وګاڼه او د کانونو او پټرولیم وزارت له رهبري څخه یې مننه وکړه چې د هېواد کاني زېرمو په برخه کې یې د پانګونې لپاره مناسبه زمینه برابره کړې ده.

د سوداګرۍ خونې رئیس ښاغلي محمد یونس مهمند او د سوداګرۍ خونې مرستیال ښاغلي خان جان الکوزي هم خبرې وکړې، د داسې بنسټيزو قراردادونو لاسلیک یې د هېواد د اقتصادي پراختیا او پرمختګ لپاره اړین وباله ویې ویل: په افغانستان کې سرتاسري امنیت او پانګونې لپاره مناسب فرصتونه برابر دي، کورني او بهرني پانګوال کولائ شي په ډاډ سره د هېواد په کانونو باندې پانګونه وکړي.

د یادولو وړ ده چې د کندهار، هرات او پروان ولایت جبل السراج سمنټو پروژو باندې 462 میلیونه ډالرو په ارزښت پانګونه شوې ده او 15000زره کسانو ته به په مستقیم ډول د کار زمینه برابره شي.