د کانونو او پټرولیم سرپرست د تالک کانونو له قراردادیانو سره وکتل
د کانونو او پټرولیم وزارت سرپرست الحاج ملا هدایت الله بدري د چهار شنبې په ورځ (1403/5/10) نېټې په خپل کاري دفتر کې د ننګرهار ولایت د تالک کانونو له قراردادیانو سره وکتل.
په دې ناسته کې د تالک کان قراردادیانو د خپلو کارونو او فعالیتونو په اړه هر اړخیز معلومات وړاندې کړل او د خپلو کارونو او فعالیتونو د ښه والي په موخه یې خپل وړاندیزونه او ستونزې د وزارت له سرپرست سره شریکې کړې.
د کانونو او پټرولیم وزارت سرپرست د تالک کانونو قراردادیانو ته ډاډ ورکړ، چې د دوی ستونزې او وړاندیزونو ته به د کانونو د قانون او طرزالعمل مطابق رسېدنه وشي.
