د کانونو او پټرولیم وزارت اداري غونډه ترسره شوه
د کانونو او پټرولیم وزارت سرپرست الحاج ملا هدایت الله بدري په مشرۍ اداري غونډه د چهارشنبې په ورځ د ۱۴۰۴کال د ثور میاشتې په ۲۴مه نېټه د یاد وزارت مالي او اداري مرستیال مولوي حسامالدین صابري، رئیسانو او آمرینو په ګډون د وزارت د غونډو په تالار کې ترسره شوه.
د غونډې په پیل کې یو شمېر رئیسانو خپل کاري راپورونه وړاندې کړل ورپسې د کانونو او پټرولیم وزارت سرپرست د بېلابېلو برخو د چارو چټکتیا او پلي کېدو په اړه خبرې وکړې او اړینې لارښوونې یې وکړې.
د وزارت سرپرست مسوولینو ته لارښوونه وکړه، چې د چارو د ښه والي لپاره لا ډېر کوښښ، پاملرنې او همغږي ته لومړیتوب ورکړي د وظیفوي غفلت څخه مخنیوی وکړي، د کانونو تړونونه دې وارزوي او مراجعینو ته د اسانتیاوو برابرولو په برخه کې پاملرنه وکړي تر څو چارې په ښه ډول ترسره شي.
په پای کې د کانونو او پټرولیم وزارت سرپرست د ګډونوالو ستونزې او وړاندیزونه واورېدل او د ستونزو د حل لپاره یې اړینې لارښوونې و کړې.
