د کانونو او پټرولیم وزارت د برنامو د تطبیق د ستر سلاکار پر موټر د تروریستي برید په اړه مطبوعاتي اعلامیه
د افغانستان د پرمختګ او هوساینې دښمنانو، د خپلو جنایتونو په دوام کې، نن سهار د کابل د نهمې ناحیې په څلورم مکرویان سیمه کې، د کانونو او پټرولیم وزارت د برنامو د تطبیق د ستر سلاکار عبدالله آصفي پر موټر د مقناطیسي ماین چاودنه وکړه. له نېکه مرغه، په دې پېښه کې عبدالله آصفي ته زیان نه دی اوښتی او دده موټرچلونکی فضل محمد سطحی ټپي شوی دی.
د کانونو او پټرولیم وزیر محمد هارون چخانسوري د دې تروریستي برید د غندلو ترڅنګ وویل: د افغانستان د پرمختګ او هوساینې دښمنان، د دا ډول بریدونو په ترسره کولو سره، هېواد او خلکو ته د خدمت په ډګر کې د ځوانانو د ژمنې او روحیې مخنیوی نه شي کولای. ځوانان دې خاورې ته ژمن دي او په لا زیاتې انرژۍ سره به د هېواد د پرمختګ او ترقۍ لپاره کار کوي.
