د کانونو او پټرولیم وزارت سرپرست د بامیانو ولایت د سرب او جستو کان څخه لیدنه وکړه
د کانونو او پټرولیم وزارت سرپرست الحاج ملا هدایت الله بدري او ورسره مل پلاوي د بامیان ولایت د یکاولنګ ولسوالۍ د ګنده کوتل دسرب او جستو له کان څخه د یوه کاري سفر په ترڅ کې په داسې حال کې چې د بامیان والي مولوي عبدالله سرحدي هم ګډون درلود، لیدنه وکړه.
د کانونو او پټرولیم وزارت سرپرست د یاد شوي کان له کاري بهیر څخه د لیدنې پر مهال دیاد ولایت د سرب او جستو کان د قراردادي شرکت د مسوولینو ستونزې او وړاندیزونه واورېدل او د دوی د ستونزو د حل په برخه کې یې د همکارۍ ژمنه وکړه، نوموړي دغه راز د يکاولنګ ولسوالۍ د آهن سياه درې له کاني زېرمو څخه هم ليدنه وکړه او په ورسپارل شویو چارو کې د لا روڼتیا په موخه یې مسؤلینو ته لازمې سپارښتنې وکړې.
