د کانونو او پټرولیم وزارت سرپرست د جنوبي افریقا له علماوو او سوداګرو سره وکتل

 د کانونو او پټرولیم وزارت سرپرست شیخ الحدیث شهاب الدین دلاور د جنوبي افریقا له یو شمېر علماوو او سوداګرو سره په خپل کاري دفتر کې وکتل.
د جنوبي افریقا سوداګرو د کانونو او پټرولیم وزارت له سرپرست سره په لیدنه کې په افغانستان کې د پانګونې لپاره شرایط او فرصتو مناسب وبلل، د افغانستان د کاني زېرمو سروزرو، مسو، تېلو او ګازو په برخه کې د پانګونې په موخه خپله لېوالتیا څرګنده کړه، د يادو کانونو په برخه کې یې د پانګونې په موخه د کانونو او پټروليم وزارت څخه د همکارۍ غوښتنه وکړه.
د کانونو او پټرولیم وزارت سرپرست افغانستان ته د دوی د راتګ هرکلی وکړ زیاته یې کړه: افغانستان د سرو زرو، اوسپنې، مسو، لیتیمو، سرب او جستو، قیمتي او نیمه قیمتي ډبرو، د نفتو او ګازو خورا زیاتې کاني زېرمې لري، د هرات د نفتي حوزې د ۱۱ بلاکونو په ګډون یو شمېر نورې پروژې اعلان ته سپارل شوي دي، که لېوالتیا لرئ کولای شئ په دغو پروژو کې پانګونه وکړئ.
 دغه راز د کانونو او پټرولیم وزارت سرپرست د افغانستان د کاني زېرمو په برخه کې د پانګونې په موخه د دوی دلېوالتیا هرکلی وکړ ژمنه یې وکړه، چې د اړوندو قوانینو مطابق به یادو سوداګرو ته لازمې اسانتیاوې برابرې کړي.